CEBU, Philippines — Usa patay sa nahitabong panagbangga sa motorsiklo ug pick-up truck diha sa Sitio Bahak, Barangay Poblacion, Lungsod sa Liloan kagahapon sa kadlawon.
Nalambigit sa moang disgrasya ang usa ka puti nga Toyota Hi-lux pick-up truck ug itom nga Rusi 125 nga motorsiklo.
Gikataho nga si Rico Landiza, 49-anyos, minyo, taga Lungsod sa Minglanilla ang nagmaneho sa pick-up truck ug ang motorsiklo gipamenho kini ni Joebert Amar Caburnay, residente sa Lungsod sa Dalaguete.
Base sa imbestigasyon sa Liloan Police Station nga ang motorsiklo nagbiyahe diha sa northbound lane sa national nighway sa lugar nga nahitaboan samtang ang Toyota Hi-lux nagbiyahe sa southbound lane.
Samtang nagkaduol ang motorsiklo nga gimaneho ni Caburnay giingong na overshoot kini sa blind curve sa maong dapit.
Nisuway og likay ang drayber sa Toyota Hi-lux apan nawagtangan og control ang drayber sa motorsiklo hinungdan nga nibangga kini sa front side sa truck.
Ug gumikan sa ka kusog sa impact patay diha-diha ang drayber sa motorsiklo.
Ang patay’ng lawas sa biktima gidala ngadto sa Maturan Memorial sa Barangay Catarman, Lungsod sa Liloan. (BANAT NEWS)