PRO-7 padayon ang kampaniya batok sa loose firearms

CEBU, Philippines — Wala mohunong ang kampaniya sa Police Regionals Office (PRO)-7 batok sa loose firearms matud Police Lieutenant Colonel Gerard Ace Pelare, tigpamaba sa PRO-7.

Nasayran nga ubay-ubay na og nakompiska nga armas ang kapolisan sa Central Visayas ug anaa usab sila'y mga nasikop nga ilegal nga naghupot og armas.

Matud ni Pelare nga nagpadayon ang maong kampaniya sa PRO-7 ilabi na nga nagkaduol na usab ang midterm election. Sa pagkakaron, ang Probinsiya sa Negros Oriental maoy gitan-aw sa PRO-7 nga adunay presensiya sa armadong grupo.

"Of course kahibalo man ta nga naay previous incidents diha unya naa sad ta’y mga occasional nga maobserbahan nga Communist Terrorist Group mao nay atong gi-focus nga ma-neutralize ning mga very minimal number of armed persons in Negros Oriental", padayag ni Pelare.

Hinuon giklaro ni Pelare nga wala usab nila gisalikway ang posibilidad nga ang ubang lugar sa Central Visayas adunay mga indibidwal nga magpahimulos usab atol sa piniliay hinungdan nga usa kini sa ilang gitutokan subay sa mando ni Police Brigadier General Anthony Aberin, direktor sa PRO-7. (BANAT NEWS)