Kristine posibleng mobalik sa PAR

CEBU, Philippines — Ang severe tropical storm nga Kristine nga nagdala og grabeng kadaut sa pipila ka bahin sa Luzon partikular na sa Camarines Sur ug Bicol Region, hingpit na nga mibiya sa Pilipinas kagahapon sumala sa Philippine Atmospheric Geophysical Astronomical Service (PAGASA).

Sumala sa state weather bureau mibiya ang bagyong Kristine sa Philippine Area of Responsibility (PAR) alas-2 sa hapon kagahapon.

Apan sumala sa PAGASA nga adunay posibilidad nga ang maong bagyo mobalik sa PAR ini’g ka Domingo o sa adlaw nga Lunes ug dayon moirog eastward o pasidlakan.

“However this scenario heavily depends on the behavior of the tropical cyclone east of PAR region and the behavior of other synoptic weather systems surrounding KRISTINE while over the West Philippine Sea,” matud sa PAGASA.

Ang bagyong Kristine gibanabana nga mas mokusog pa samtang manguso kuso sa West Philippine Sea.

Sa pikas bahin, ang Office of the Civil Defense mitaho nga miabot na sa 46 ang natala nga namatay tungod sa maong bagyo.

Sa taho sa Philippine Star, moabot sa 28 ang patay sa Bicol kun diin 14 niini ang sa Naga City; aduna pud natala nga nakalas sa Albay, Catanduanes, Masbate, Camarines Sur, Camarines Norte ug sa Sorsogon. Ang Calabarzon nga rehiyon (gilangkoban sa Probinsya sa Batangas, Cavite, Laguna, Quezon ug Rizal), nakatala pud og 15 nga patay. Aduna pud natala nga tag usa ang patay sa Ilocos Region, Central Luzon ug Zamboanga Peninsula.

Dili momenus 20 pud ang na missing tungod sa maong bagyo nga nagdala og grabeng pagbaha, pagdahili sa yuta nga milubong sa pipila ka mga sakyanan ug struktura sa nahisgotang mga rehiyon.

Sa Probinsya sa Sugbo, pipila pud ka mga dalan sa lungsod sa Alegria ang temporaryon gisirad-an sama sa Sitio Cagubaan, Barangay Valencia ug Sitio Lower Tuogop sa Barangay Lepanto.

Ang PAGASA padayon nga mipahimangno sa publiko nga kanunay mag-amping tungod sa dili maayong panahon hilabina nga dunay laing tropical depression nga nasigpatan gawas sa PAR nga panganlan og Leon kon kini mosulod sa Pilipinas.  (BANAT NEWS)