CEBU, Philippines — Sa prisuhan ang punta, sa magtiayon human gireklamong nang-scam ug nasikop sa entrapment operation sa kapulisan sa Mabolo Police Station 4 sa Cebu City Police Office sa Barangay Mabolo, siyudad sa Sugbo niadtong Huwebes sa hapon, Oktubre 24, 2024.
Ang magtiayon gireklamo sa tag-iya sa usa ka kan-anan sa Barangay Labangon human giingong mi-order og pagkaon kanila pinaagi sa online apan ang ‘proof of payment’ gi-peke pinaagi sa pag-edit.
Nadiskubrehan sa negosyante nga dili lang kausa kini gihimo kaniya sa mga suspetsado.
Ilang nasubay nga makadaghang higayon nila kini gibuhat sulod sa usa ka semana nga nagsige og order og pagkaon sa ilang kan-anan. Sa pagsuma-total niabot tanan P280 mil ang kantidad sa tanang pagkaon nga wala nila bayari.
Matud pa dunay gipakita nga transaction receipt nga nabayaran na apan dili diay kini tinuod, ang pagkatinuod wala kini makabayad sag i-order.
Apan niadtong Huwebes, ang katapusang order sa duha diha sa ilang kan-anan nga mobalor og kapin P10,000.
Nagkanayon si Police Major Romeo Caacoy Jr., Hepe sa Mabolo Police Station 4 nga modus sa mga suspek nga mo-order online og pagkaon nga dinaghan kay ang uban ilang ibaligya ug ang uban ikunsumo.
Gani dili kini ang unang higayon nga ang maong magtiayon nadakpan gumikan sa maong krimen.
"Di ba mag bayad ta online?, GCash naa man man ang payment niya naa man nay successfully send i-edit ra diay na nila," sigon ni Caacoy.
Lain sab nga giingong nabiktima sa mga suspetsado ang niadto sab sa police station ug kini nireklamo nga ni-order sab kaniya ang magtiayon og klase-klaseng pagkaon nga nagkantidad og P6,000 apan sama sa nahitabo sa unang nireklamo wala gyud siya mabayari sa pagkatinuod.
Nasayran sab niya nga nag-book usab og hotel ang mga suspek ug sa biktima gi-charge ang bayad.
Nanawagan ang kapulisan sa posibleng uban pang nabiktima sa maong modus nga moadto sa ilang buhatan alang sa pagpasaka og dugang kaso batok sa mga suspetsado. (BANAT NEWS)