CEBU, Philippines — Padayon ang pagpangita sa 15-anyos nga batang lalake nga na-missing samtang naligo sa dagat kauban ang uyab niini diha sa Sitio Lupa, Barangay Punta Engaño, dakbayan sa Lapu-Lapu niadtong Miyerkules sa hapon, Oktubre 23, 2024 samtang padayon ang kusog nga hapos sa hangin ug paguwan dala sa bagyong Kristine.
Ang inahan sa bata nga si Alma Talingting mi-post sa Facebook niadtong Miyerkules nga nangayo og tabang aron luwason ang iyahang anak nga na-missing. Duna sab kini post nga nagpakitabang sa Local Government Unit sa Dakbayan sa Lapu-Lapu. Nasayran nga kuyog sa 15-anyos ang iyahang hinigugma nga 15-anyos usab nga babaye.
Halos dili pa maestorya og tarong ang uyab bahin sa nahitabo apan iyang nasulti nga naligo sila sa dagat sa dihang kalit silang gilamba og dagkong bawod.
Nisuway unta sa pagsaka ang lalaki apan gihapsan kini pagusab sa dagkong bawod ug gibanlas balik sa dagat.
Matud pa sa dalagita, nangayo og tabang ang iyahang uyab maong niambak siya aron unta kini luwason apan silang duha na hinuon ang galisod og haw-as ug wala na gyud niya kini natabang pagbira padaplin.
"Wala nako siya natabangan, nisaka ko ako ra usa, maypa ako ‘to siya gisung-ay bahalag akoy mamatay Ma," gahilak nga estorya sa 15-anyos nga dalagita.
Ang inahan sa batan-on miingon nga alas- 4 sa hapon niadtong Miyerkules siya gipahibawo sa pamilya sa uyab sa iyahang anak nga niadto sa ilang balay.
Nasayran nga ang binatilyo dili kahibawo molangoy maong dili siya mosugot nga maligo kini og dagat nga walay mga hamtong nga kauban.
Nagtinabangay na ang Disaster Risk Reduction and Management Office sa Lapu-Lapu City, Bureau of Fire Protection, Philippine Coast Guard , Lapu-Lapu City Police Office divers ug ubang volunteers aron makit-an ang binatilyo.
Ang mga residente sa dapit miingon sa mga ingon ini nga mga buwan ug sa lakaw sa panahon karon, ang sulog sa dagat padung sa amihanan.
Hinungdan Si Nagiel Bañacia, pangulo sa DRRMO Lapu-Lapu City nanawagan sa publiko ilabi na sa Isla sa Camotes , Northern Cebu o kaha Leyte kun duna may makit-an nga lalake nga 5'4 ang gitas-on, medium built ipahibawo sa otoridad.
"Karon man habagat padung sa Norte ang hangin... Unya ato nana na report sa OCD, missing person sa atoang area of responsibility," sigon ni Bañacia. IBM BANAT NEWS