CEBU, Philippines — Naangol ang usa ka 17-anyos nga bayong-bayong human kini dunggaba sa duha ka lalaki dihang padulong na unta sila mouli gikan sa diskohan sa Purok Kalingawan, Barangay Inayagan, Dakbayan sa Naga kagahapon sa kadlawon.
Ang biktima residente sa Sitio Taya, Barangay Uling sa nahisgutang siyudad.
Samtang ang mga suspetsado mao sila si Johnrey Antonio Bersabal, 24-anyos, residente sa Purok Sakaon, Barangay Inayagan ug John CarI Incipido, 20, molupyo sa Purok Bunturan, Barangay Inayagan sa maong gihapong siyudad.
Base sa imbestigasyon sa kapolisan sa Dakbayan sa Naga nga ang biktima aduna kini mga kauban padulong na unta nga manguli gikan sa diskohan.
Ang duha ka suspetsado kalit lang nga nibutho ug gisumbag ug gidunggab ang biktima sa likod.
Ang kapolisan nipahigayon og hot pursuit operation human nitaho ang biktima sa maong hitabo ug nasikop ang mga suspetsado.
Ang kapolisan nagpahigayon kini og dugang imbestigasyon sa hinungdan sa maong hitabo samtang ang mga suspetsado gikatakdang pasakaan og tukmang kaso sa nahimo nilang kalapasan. (BANAT NEWS)