CEBU, Philippines — Magsilbi na usab nga acting mayor sa dakbayan sa Sugbo si vice mayor Donaldo “Dondon” Hontiveros hangtud sa kataposan ning semana.
Sa nasayran si Hontiveros nahimo na nga acting mayor sa Cebu City sa panahon ni mayor Mike Rama ug karon na usab kang mayor Raymond Garcia.
Si Hontiveros mao ang ni-isyu og executive order kabahin sa suspension sa klase sa siyudad sa Sugbo niadtong miaging adlaw tungod sa bagyong Kristine. Kini tungod kay si Garcia giingong tua sa Japan alang sa usa ka official business samtang ang nahibiling adlaw sa semana mao ang panahon sa iyang pamilya.
Ang pag-isyu ni Hontiveros og kamanduan kabahin sa pagsuspenso sa klase gihangop sa mga ginikanan ingon man sa mga tinun-an gumikan kay sayo pa kini nga napahibawo.
Gihimo na usab ni Hontiveros ang pagsusi sa kabarangayan ilabi na kadtong mga coastal barangays nga gituhuan nga maoy unang maapektohan sa dili maayong kahimtang sa panahon.
Lakip sa iyang gisusi ang mga na-stranded nga pasahero tungod sa bagyo ug kauban niya ang Disaster chief Harold Alcontin ug mga konsehal nga sila si Philip Zafra ug Joel Garganera.
Ang kagamhanan sa siyudad pinaagi sa Department of Social Welfare Services ang nihatag na og libreng pagkaon ingon man dugang tabang sa mga na-stranded nga pasaghero diha sa San Roque ug Tinago gym nga maoy nahimo nilang temporaryong kaistaran.