Senior citizen center tukoron sa siyudad sa Sugbo
CEBU, Philippines — Mi-uyon na si mayor Raymond Alvin Garcia nga magtukod og senior citizen center sa Dakbayan sa Sugbo human mipasar sa konseho nga gipanguluhan ni Konsehal Pastor Jun Alcover.
Si Alcover maoy chairman sa Senior Citizens Committee sa siyudad ug matud pa niya nga nakadayeg gyud siya sa gihimo sa Lungsod sa Moalboal diin adunay doktor nga kanunay nga andam muhiling sa mga senior citizen. Gani, ang maong mugna anaa sab kini sa Tagum City, Davao del Norte.
Atol sa press conference ni mayor Garcia niadtong Lunes, Oktubre 21, 2024, siya miingon nga nakita niya ang video nga gibuhat sa siyudad sa Tagum diin naatiman ug naamuma gyud ang katiguwangan sa siyudad.
“I was very impressed unya nakaingon ko, kanindot ana noh kung naa tay ingon ana diri”, suma pa ni Mayor Garcia.
Plano ni Garcia nga sa open space tukoron ang maong center ug usa sa iyang napanglantawan nga tukuron kini sa South Road Property (SRP) diin dul-an 300 ka hektarya ang maong lugar.
“So 30 percent of 300, imagine 90 hectare open spaces ang SRP, it already includes the roads pero dako kaayo gihapon ang mabilin sa parks and playground mao na if ever ato ning ipadayon ang senior citizen center, we can go to SRP kay daghan kaayo ta og yuta diha nga for open spaces,” matud ni mayor Garcia.
Si Konsehal Alcover miingon walay magamit nga building ang mga senior sa dakbayan diin adto unta sila makapahigayon og pag exercise ug mga educational, health, ug social programs. (BANAT NEWS)
- Latest
