CEBU, Philippines — Patay ang usa ka Top 1 Most Wanted Person sa Region 7 human nisukol sa kapulisan sa Argao Police Station dihang gi-implementar ang walo ka warrants of arrest niini sa Sitio Magkabayo, Barangay Capio-an, Lungsod sa Argao kagahapon sa kaadlawon.
Ang namatay mao si Roel Antiquina Gomez alyas Santino, residente sa Colawin sa maong lungsod.
Si Gomez dunay warrant of arrest sa kasong illegal discharge of firearms; tulo ka warrants of arrest sa kasong murder ; warrant of arrest sa kasong robbery with homicide; warrant of arrest sa kasong kalapasan sa Republic Act 9165 ug warrant of arrest sa kasong kalapasan sa 10591 ingon man warrant of arrest sa kasong attempted murder.Apan pag-abot nila sa balay nga iya sa usa ka Helen Davin diin kini nagtago, nakabantay kini nga mga polis ang nangabot. Gikataho nga giunhan niini pagpusil ang mga polis hinungdan nga kini gibawsan. Gidala siya sa Isidro Kintanar Memorial Hospital apan patay na.
Sigon ni Police Major Janus Giangan, hepe sa Argao Police Station nga pirmeng magbalhinbalhin ug gipuy-an ang suspek.
Nadakpan sab ang kauban ni Gomez nga si JR Davin Loquinario, 29, nga nakuhaan sab og kalibre .45 nga armas nga dunay upat ka bala. IBM BANAT NEWS