CEBU, Philippines — Dili momenus 40 ka mga local government units sa Probinsya sa Sugbo ang misuspenso sa klase sa mga tunghaan nga sakop sa ilang mga lungsod ug siyudad tungod sa dili maayong panahon dala sa bagyong Kristine.
Sa situational report sa Provincial Disaster Risk Reduction and Management Office (PDRRMO), apil sa mga nagsuspenso og klase mao ang Asturias, Aloguinsan, Boljoon, Bogo City Bantayan, Badian, Balamban, Daanbantayan, Danao City, Medellin, Minglanilla, Madridejos, Moalboal, Oslob, Pinamungajan, Pilar, Poro, San Remigio, Sibonga, Santa Fe, San Francisco, Santander, Sogod, Toledo City, Talisay City, Tabogon, Tabuelan, Tudela, Liloan, Cordova, Naga City, San Fernando, Ginatilan, Consolacion, Argao, Mandaue City, Catmon, Barili, Dumanjug ug Carcar City.
Ang Boljoon, Sibonga ug Tabogon misuspenso sa klase sa tanang lebel apan sa mga pampubliko nga tunghaan lang. Si Talisay City Mayor Samsam Gullas nagkanayon pud nga ang desisyon sa pagsuspenso sa klase sa mga pribadong tunghaan ug sa Talisay City College magdepende sa presidente sa tunghaan.
Gawas sa pagsuspenso og klase, aduna pud mga byahe sa barko ang kanselado kagahapon, apil na niini ang mga barko gikans sa Hagnaya Port sa lungsod sa San Remigio padulong sa Masbate Leyte ug Santa Fe; ug ang barko gikan sa Danao port padulong sa Camotes Island.
Kagabii, si Lapu-Lapu City Mayor Junard “Ahong” Chan misuspenso sa klase karong adlawa Oktobre 23, 2024 tungod gihapon sa bagyo.
Samtang si Cebu City Vice Mayor Donaldo Hontiveros nimando sab sa pagsuspenso sa mga klase sa tanang lebel sa pribado ug pampubliko nga mga tunghaan sa syudad karong adlawa, Oktubre 23, 2024 tungod sa kusog nga hangin dala sa bagyo.
Sumala sa PDRRMO, maobot sa 39 ka mga inbidwal ang ilang natala nga na stranded sa Hagnaya Port.
Sa pagsulat niining balita, wala pay nadawat nga report ang PDRRMO sa danyos o bisa’g unsa nga insidente sa kalungsoran tungod sa dili maayong panahon dala sa bagyo.
Sa bahin sa Cebu Port Authority (CPA), mipahibalo usab sa pagkanselar sa mga byahe gikan sa Cebu padulong sa Hilongos, Dumaguete, Siquijor, Calbayog/ Masbate; Maya padulong Malapascua (vice versa) ug Matnog Port; Cebu padulong sa Ormoc, Maasin, Surigao, Palompon ug Dipolog.
Base sa alas-5 nga weather bulletin sa PAGASA ang sentro sa bagyong Kristine anaa sa 390 kilometro sa sidlakang bahin sa Daet, Camarines Norte nga nagdala og hangin nga 75 kilometro matag takna duol sa sentro ug paghuros nga 90 kilometro matag takna.
Nag-irog ang bagyo west northwestward sumala sa state weather bureau.
Pipila pud ka mga dapit sa Luzon, Visayas ug Mindanao ang gipaubos sa tropcial cyclone wind signal nubmer two ug one.
Sa Visayas, ubos sa TCWS1 mao ang rest of Eastern Samar, the rest of Northern Samar, Samar, Leyte, Biliran, ug Southern Leyte.
Signal number 2 pud ang Northern Samar (Palapag, Mapanas, Gamay, Laoang, Catubig, Lapinig, Pambujan, San Roque) ug northern portion sa Eastern Samar (Jipapad, San Policarpo, Arteche). Rowena Capistrano ug Gabriel Bonjoc /IBM BANAT NEWS