CEBU, Philippines — Ang kampo nilang dismissed Cebu City mayor Michael Rama ug Mandaue City mayor Jonas Cortes nagmaya human nga miluwat ang Korte Suprema og Temporary Restraining Order (TRO) pabor nilang duha nga epektibong nagpugong sa COMELEC sa pagrebukar sa ilang giduso nga certificates of candidacy alang sa 2025 midterm elections.
Kahinumduman nga niadtong Oktubre 3, 2024 gitaktak sa pagkamayor sa siyudad human nahukman sa Ombudsman nga “guilty of nepotism and grave misconduct” si Rama.
Samtang si Cortes nahukman sab nga guilty may labot sa operasyon sa usa ka cement batching plant nga walay mga permits.
Ang Ombudsman mipahamtang sab kanila og perpetual disqualification to hold public office. Basi sa patakaran sa Comelec, ang mga opisyales nga nakaduso og COCs apan napahamtangan og silot nga perpetual disqualification sa Ombudsman, kinahanglang i-revoke ang ilang kandidatora agi og pagtahod sa gahum sa maong hukmanan.
Bugtong makapahunong niini ang TRO gikan sa mas labaw nga hukmanan sama sa Appellate Court o sa Korte Suprema.
Niadtong Oktubre 7, nisang-at og petisyon ngadto sa Korte Suprema si Rama pagpahunong sa Comelec sa pag-revoke sa iyang COC. Susamang aksyon sab ang gihimo ni Cortes.
Sa gipagawas nga gihiusang tubag Korte Suprema sa mga petisyon sa duha ug ni kanhi Albay Governor Noel E. Rosal nga parehas nila nameligro sab ma-revoke ang COC, nga nagkwestyon sa Comelec Resolution No. 11044-A nga pinetsahan niadtong Septiyembre 4 nga nag-disqualify sa ilang kandidatura nunot sa ilang tagsa-tagsa silot gikan sa Ombudsman.
Gimando sa Korte Suprema sa Comelec nga mokomento sa mga petisyon sulod sa 10 ka adlaw sukad nadawat ang maong pahibalo.
Human nasayran sa kampo ni Rama ang maayong balita, dali kini mi-post ang mayor sa iyang Facebook page nga “TULOY ANG LABAN!!! PRAISE GOD. Daghang Salamat, Señor Sto. Niño.”
Si Cortes sa iyang bahin nagkanayon: “Ang gahum sa pag-ampo ang naghatag kanato og kusog ug giya sa tanang naagiang pagsulay. So above all, salamat sa Ginoo for His continued guidance and strength. Upholding the rule of law and the Constitution is the cornerstone of our democracy, and we are grateful to the Supreme Court for reaffirming these values. This victory underscores our unwavering commitment to justice, but it is just one part of the broader fight we continue to face. With the truth on our side, we remain steadfast, guided by transparency and the trust of the Mandauehanons. —IBM BANAT NEWS