Cebu City nigahin og P105 milyon alang sa Sinulog 2025

CEBU, Philippines — Gipahibalo ni Mayor Raymond Alvin Garcia nga nigahin ang Siyudad sa Sugbo og P105 milyones alang sa umaabot nga Sinulog sa Sugbo 2025.

Ug makadani usab ang mga premyo alang sa umaabot nga prestihiyosong kalihokan sa kapistahan ni Señor Santo Niño tungod kay ang contingents makadawat og mas dako nga ganti tungod kay gipatas-an usab ang subsidy niini base sa naaprobahan sa Sinulog Executive Committee.

Nasayran nga gikan sa P800,000 nga premyo kaniadto mahimo na kini karon nga P1.5 milyones alang sa out of town contingents samtang P1 milyon ang madawat sa mananaog nga contingent gikan sa Dakbayan sa Sugbo ug P700,000 alang sa mga mananaog nga contingent gikan sa Probinsiya sa Sugbo.

Sa umaabot nga kapistahan ibalik ang orihinal nga tema sa kasaulogan nga “One Beat, One Dance, One Vision” diin gikompirma sa Sinulog Foundation Incorporated nga 17 ka contingents ang nipadayag sa ilang intensiyon nga mosalmot sa Sinulog Grand Parade.

Karon nga mas dagko na ang mga papremyo alang sa dakong kalihokan target ni Garcia nga moabot sa 35 ka contingents ang mosalmot sunod tuig diin adunay duha ka contingents gikan sa Probinsiya sa Sugbo ang subling mosalmot.

Gikataho nga ni-boycott ang maong contingents sa duha ka tuig human nasayran nga ipahigayon ang ritual showdown diha  sa South Road Properties.

Niadtong buwan sa Agosto niining tuiga, gipahibalo ni Garcia nga ibalik ang pagpahigayon sa Sinulog 2025 diha sa Cebu City Sports Center diin nauyonan usab kini ni Gobernador Gwendolyn Garcia.

Sa laing bahin, sa unang higayon dili na pabayaron og registration fee ang buot nga mosalmot sa puppeteers ug higantes category.

 Gipasabot ni Garcia nga “form of art” kini ug buot niya nga i-promote ang mga artists.

Dagko usab ang mga madawat nga premyo sa mga mananaog sa puppeteers ug higantes category diin P100,000 ang first prize niini; P75,000 ang second prize ug P50,000 sa third prize.

Ang mga ahensiya sa gobiyerno nga mosalmot sa float category ilibre usab ang registration fee tungod kay gusto sa mayor nga mapasigarbo sa matag LGU ang ilang siyudad o munisipalidad. BDB BANAT NEWS