CEBU, Philippines — Gihangyo ni Gobernador Gwendolyn Garcia ang general manager sa Cebu Cordova Link Expressway Corporation (CCLEC) Allan Alfon nga dili lang usa ipatuman ang planong pag-umento sa bayranan sa mga sakyanan nga moagi diha sa Cebu Cordova Link Expressway (CCLEX).
Kini hangtud wala pay kausaban nga mahimo sa Toll Regulatory Council (TRC) nga maoy moaproba kon adunay adjustment sa toll fee sa maong expressway nga nagdutong sa Cebu City padulong sa Lungsod sa Cordova.
Atol sa tigom ni Garcia uban ni Alfon ug ubang opisyal sa Sugbo nasabotan nga adunay kausaban nga himuon sa concession agreement sa CCLEX aron masiguro nga ang Probinsiya sa Sugbo adunay igong representante sa TRC.
Sa pagkakaron, adunay lima ka miyembro sa TRC, usa ka representante sa Dakbayan sa Sugbo, Lungsod sa Cordova ug tulo ang sa CCLEC.
Apan si Garcia nipadayag nga angayang hatagan og representante ang Kapitolyo sanglit kasagaran sa mga moagi sa maong expressway mga taga probinsya diin giuyonan kini ni Alfon.
Base sa taho sa Sugbo News nasabotan nga gawas sa duha ka representante sa Kapitolyo sa TRC tag duha usab ang Dakbayan sa Sugbo ug ang Cordova sa representante niini o mahimong unom ang tanang representante sa mga LGU.
Si Alfon nagtuo nga makiangayon ra kini diin padayon usab ang koordinasyon nila sa gobiyerno.
Ang plano sa CCLEC nga umentohan ang toll fee og P8 ngadto sa P51. Gikan sa P90 nga toll fee sa mga Class 1 nga vehicle mahimo na unya kining P107, alang sa mga Class 2 nga sakyanan gikan sa P180 mosaka kini ngadto sa P214 ang bayad ug sa mga Class 3 nga sakyanan mahimo na unya nga P321 gikan sa P270 ang bayad.
Si Garcia nihangyo sa CCLEC nga dili usa kini ipatuman hangtud walay kausaban sa mga miyembro sa TRC ug aron usab ang mga bag-ong miyembro makaapil sa paghimo og desisyon kalabot sa maong pag-increase. BDB BANAT NEWS