Cebu City gipubos sa blue alert status
CEBU, Philippines — Giaprobahan ni Mayor Raymond Alvin Garcia ang rekomendasyon sa Cebu City Disaster Risk Reduction and Management Office kagahapon sa buntag nga isaka ngadto aa blue alert status ang siyudad isip sa pagpangandam sa Kalag-Kalag ug La Niña.
Matud ni Garcia nga base sa iyang nadawat nga taho gikan sa CDRRMO nga ang blue alert status nagpasabot kini nga on-standby ang tanang personnel sa disaster office ug ubang department nga apil sa pagpangandam sa posibleng mga emerhensiya.
Gipalabang na usab sa CDRRMO ang resolusyon alang sa ilang pagpangandam sa La Niña.
Si Garcia nagkanayon nga mas maayo nang sayo pa lang mangandam na ang siyudad sa bisan unsa nga dagan sa lakat sa panahon.
Sa laing bain, ang Cebu City Police Office (CCPO) subsob na karon ang pagpangandam alang sa Kalag-Kalag aron masiguro ang seguridad sa mga sam-ang ingon man sa mga tawo nga mobisita sa ilang mga minahal sa kinabuhi nga nitaliwan na sa laing kalibutan. Gipasabot ni Police Lieutenant Colonel Maria Theresa Macatangay, deputy city director for operations ug tigpamaba sa CCPO nga magpakatap sila og mga polis diha sa 21 ka sam-ang sa Dakbayan sa Sugbo.
Kini tungod kay dili ra ang PNP ang mohatag og assistance sa pag-obserba sa kalag-kalag apil na ang ubang ahensiya sa gobiyerno.
Giklaro ni Macatangay nga dili lang mga sementeryo ang bantayan sa kapolisan apil niini ang ubang dapit ilabi na adtoan usab og daghang tawo. Sama sa naandan adunay ibutang nga police assistance desk tulo ka adlaw sa dili pa ang Kalag-Kalag.
"Kana tanan will be in placed in proper time more or two to three days prior sa Kalag-Kalag para makapangandam ta og insakto kay kahibawo man ta naay mo visit gyud mga early on so gi-anticipate nato na sa deployment pud", dugang ni Macatangay. (BANAT NEWS)
- Latest
