CEBU, Philippines — Gipirmahan na ni Mayor Raymond Alvin Garcia ang giduso niini nga budget alang sa tuig 2025 nga nikabat ngadto sa P17 bilyones.
Matud ni Garcia nga atol sa iyang press conference niadtong Lunes sa buntag nga ang dako nga pahat sa budget mao ang Cebu City senior citizens financial assistance nga P1.1bilyon, paving ug repair sa mga kadalanan nga niabot sa P240 milyones, drugs and medicines ug uban pa.
Si Garcia nagkanayon nga malaumon siya atol sa session sa konseho nga ma-refer kini ngadto sa committee on budget aron ilaha na unya kining matuki.
Gipadayag ni Garcia nga ang giduso niya nga budget alang sa sunod tuig realistic kaayo tungod kay unsa ang makolekta mao ra man usab ang igasto nga maoy iyang gusto nga ang kita ug gasto magtakdo.
Matud usab ni Garcia nga gusto niya nga i-manage ang expectation sa katawhan nga dili siya ganahan og dako og budget apan walay makita nga services.
Ang mayor nipadayag nga ang iyang giduso nga budget duol-duol sa ilang collection dili sama sauna sa dihang siya pa ang bise mayor nga maglabad ang ilang ulo human dagko kaayo ang budget nga iduso nga layo kaayo gikan sa nakolekta nila sa siyudad. (BANAT NEWS)