Minatay susihon kun ‘gihilabtan’

CEBU, Philippines — Ang kapolisan sa Dakbayan sa Carcar ug PNP-Regional Forensic Unit-7 mikuha og swab sample gikan sa minatay nga 22-anyos nga babaye nga gilubong na apan gihabwa sa lungon ug gidudahan nga gihilabtan.

Ang maong minatay anha gilubong sa pampublikong sam-ang sa Barangay Ocaña, dakbayan sa Carcar niadtong Oktobre 19, apan pagkasunod adlaw nakit-an nga naa na sa gawas sa nitso ang lungon niini ug sa pagsusi gipasipad-an na ang patay’ng lawas.

Ang babaye giingong namatay niadtong Oktobre 9 tungod sa komplikasyon human kini nanganak.

Si Police Lieutenant Colonel Bryan O'Neil Salvacion, hepe sa Carcar City Police Station nga dili pa gyud nila makompirmar ang mga pagduda sa mga tawo ug sa banay nga giamung-amongan ang minatay hangtud wala pay resulta sa mga eksaminasyon nga gihimo sa PNP Regional Forensic Unit-7.

Una niini, ang sepulturero nga si Artemio Laputan maoy nipahibalo sa banay sa minatay kabahin sa hitabo sa dihang iyahang nakit-an ang lungon nga naa na sa gawas sa nitso pasado alas- 7 sa buntag niadtong Domingo.

Nakita sab niini nga giguba ang nitso ug ang gigamit sa mga naghimo niini mao ang iyahang bara de kabra nga naandan na niyang ibilin sa sam-ang sa iyang pagpauli.

Si Artemio nidagan dayon sa simbaban ug giadto sab niini ang pamilya sa minatay aron ipahibawo sa hitabo ug pagkahuman ilaha kining gi-report sa kapolisan.

Matud pa nga sa paghiling sa patay'ng lawas wala na kini panty ug ang sinina niini napukas na sa babaw ug nakita ang dughan niini. Gawas pa, gibalik man tuod kini og suds a lungon apan nabali kay ang ulo niini naa na sa tiilan gibutang.

"Nabali gyud siya pagkabutang na sa lungon, imbes iyahang nawong ari sa pirmiro ang iyahang tiil ari na sa bildo," sigon ni Artemio.

Ang maguwang sa  minatay nga wala na nagpahingan dako gyud ang pagtuo nga nahilabtan gyud iyahang manghod tungod kay napukas na ang sinina niini ug wala nay panty ug nagkahugaw sab ang lawas niini.

"Para unsa ang motibo nga gihuboan man siya aside from that ang iyahang tibuok lawas puno kaayo sa buling so meaning gialsa gyud siya gikan sa lungon padung sa yuta," sigon sa igsuon.

Apan si Salvacion mipasabot nga mao kini ang rason nganong nagkuha sila og specimen gikan sa kinatawo niini aron pagtan-a kun duna bay semen o duga sa lalaki ayha pa makaingon kun kini gipasipad-an.

"In the first place naa na sa state of rigor mortis ang katong patay gahi na kay siya even sa pag swab maglisod og palihok sa mga unod niya so mao nga karon we're still waiting for the report," asoy ni Salvacion.

Aduna nay mga persons of interest ang Carcar City Police Station apan wala una gibutyag sa kapulisan kung pila ka buok ug ang usa naimbitar na apan hugtanon kining nihimakak.

Matud niini nibiyahe siya padung sa Cebu City Sabado ug alas 11 na sa gabii kini nakabalik. Tungod kay mag-dispatser pa siya ini og alas-3 sa kaadlawon adto nalang siya natulog sa gawas, apan tungod sa kakapoy wala siya nakasayo og mata.

Ang pamilya nangayo og hustisya batok sa mga nipasipala ang ilang minatay. Nasayran nga nasulod kini sa ICU sa tambalanan tungod sa komplikasyon human sa pagpanganak niadtong Septiyembre 11.

Pagka Septiyembre 19  gidala kini sa tambalanan apan nakabsan kini sa kinabuhi niadtong Oktubre 9, 2024 ug gilubong Oktobre 19 na.   Dinhi sa Pilipinas, walay balaod nga nagsilot batok niadtong makighilawas og patay  o gitawag og “necrophilia.” Apan dunay balaod nga nagsilot niadtong mopasipala sa mga minatay o patay’ng lawas ubos sa Revised Penal Code. (BANAT NEWS)