CEBU, Philippines — Nihimo na og imbestigasyon ang Cebu City Police Office sa nahitabong bomb scares sa duha ka unibersidad sa siyudad sa Sugbo kagahapon sa buntag, Oktubre 21, 2024.
Una niini, ang mga tinun-an sa Cebu Technological University (CTU) gipagawas sa campus human usa ka Facebook account nga nag post og bomb threat. Ang bomb threat dunay gipauban nga hulagway sa hitsura sa bomba nga C4 ug timer, apan nasuta nga ang mga picture nakuha ra pinaagi sa Google.
Gisundan sab kini sa Cebu Institute of Technology-University(CIT-U) hinungdan nga
nakanselar sab ang ilang klase.
Sigon ni Police Lieutenant Colonel Maria Theresa Macatangay, Deputy City Director for Operations ug tigpamaba sa Cebu City Police Office nga dili tinuod nga dunay mga bomba sa maong mga eskuylahan human nag-inspeksyon ang Explosive and Ordinance Division ug Cebu City Police Office.
Giangkon ni Macatangay hagit gyud kanila ang pag-ila sa responsable kay sa social media sayon nalang kaayo ang paghimo og dummy accounts.
Apan kun mailhan nila kun kinsay nagpaluyo niini ilaha dayun kining kasohan og paglapas sa Presidential Decree 1727 o kining Anti-Bomb Joke Law. (BANAT NEWS)