CEBU, Philippines — Gimando ni Mayor Patrick Barcenas sa Dakbayan sa Carcar nga kutob nalang sa alas-12 tungang gabii ang pagpamaligya og ilimnon nga makahubog ug ala-una sa kaadlawon kinahanglang sirado na kining maong mga establisamento.
Gipadayag kini sa mayor human sa ilang gihimong tigum uban sa mga nanag-iya og imnanan sa may daplin sa baybayon sa barangay Tuyom.
Kini human adunay tulo nga nakalas ug tulo ang naangol kay nalaras sa usa ka sakyanan nga gituohan nga gimaneho ug hubog nga SK Councilor diha sa Barangay Road sa Barangay Valladolid niadtong Domingo sa kaadlawon.
Sumala pa ni Barcenas magpaabot nalang siya sa ipasar nga ordinansahon sa konseho sa siyudad aron kini magsilbing giya sa tanan.
Si Barcenas, miingon nga base sa pakighinabi niya sa pamilya sa SK Councilor andam nilang tubagon ang maong nahitabo nga insidente nga nikalas og dili mominos tulo ka tawo ug adunay mga naangol nga naa pa sa tambalanan.
Sa pikas bahin, maayo na ang kahimtang sa usa sa duha ka mga batan-ong nadala sa tambalanan tungod sa maong aksidente. Samtang ang laing usa pabilin nga unconscious apan dunay kalambuan sa kahimtang niini matud pa sa kapolisan.
Ang driver sa SUV nga SK Councilor naka detain sa Carcar City Police Station ug giandam na sa kapulisan ang kasong reckless imprudence resulting in multiple homicide ug multiple physical injuries.
Sigon ni Police Lieutenant Colonel Bryan O'Neil Salvacion, hepe sa Carcar City Police Station
kun dunay settlement nga mahitabo tali sa pamilya sa suspek ug sa mga biktima , wala nay labot niini ang kapulisan ug didto na kini buhaton sa piskalya.
Niangkon matud pa ang suspek ngadto sa kapulisan nga nakainom kini dihang nahitabo ang insidente. (BANAT NEWS)