CEBU, Philippines — Ang digitalization program sa Barangay Gun-ob sa Siyudad sa Lapu-Lapu maoy nahimong kabahin sa gihisgotan ni Barangay Captain Carl Wiegel sa iyang State of the Barangay Address (SOBA) nga gihimo niadtog Sabado.
Matud pa ni Kapitan Wiegel nga kon ang mga molopyo sa barangay Gun-ob adunay buot ipadangat nga kasayuran ngadto kanila nga mga opisyal sa barangay dili na kinahanglan nga moadto personal sa ilang barangay hall tungod kay mahimo man kini nilang ipadangat gamit ang social media.
Lakip sa mga reklamo nga mahimong ipadangat mao ang kabahin sa wala mahakot nilang basura, gibahaan ang ilang dapit ug uban pa.
Giladlad usab ni Kapitan Wiegel ang mga programa ug proyekto nga iyang giptuman ubos sa iyang administrasyon.
Subay niini sa labing unang higayon ang Barangay Gun-ob ang magpasiugda usab og Litson ug puso festival isip kabahin sa ilang kalihokan sa tinuig nilang piyesta karong adlawa, Lunes Oktobre 21, 2024.
Himoon ang showdown sa mga contingent sa Hoops Doom sa Barangay Gun-ob sa maong siyudad.
Dugang kalingawan mao ang ilang pagbuhi sa tulo ka baboy nga gikaligo sa mantika ug ang makadakop mao na ang manag-iya og mao usab ang makadawat sa giandam nilang ganting salapi.
Kini bukas sa tanan bisan dili molopyo sa Barangay Gun-ob nga gusto nga mosalmot sa maong kompetisyon nga mao ang pagdakop og baboy. (BANAT NEWS)