CEBU, Philippines — Giaprobahan sa hunta probinsiyal ang mga lahi-lahi nga resolusyon sa pagdayeg sa duha ka drug cleared nga barangay sa Lungsod sa Balamban ug Siyudad sa Talisay.
Ang Barangay Cabagdalan sa Lungsod sa Balamban ug Barangay Dumlog sa Dakbayan sa Talisay gideklarar nga mga drug cleared sa Region VII Oversight Committee on Barangay Drug Clearing Operation.
Ang deklarasyon subay kini sa Philippine Drug Enforcement Agency (PDEA) Memorandum Circular No. 2020 – 026 ug Dangerous Drugs Board (DDB) Regulation No. 4, serye sa 2021 nga nagpadayon sa pagpatuman sa Barangay Drug Clearing Program (BDCP).
Ang duha ka barangay nakahatag sa tanang rekisitos nga nalatid sa PDEA Memorandum Circular No. 2020 – 06 o ang Omnibus Procedures sa Pagdeklarar sa Usa ka Drug-Affected Barangay nga “Drug-Cleared” ingon man sa DDB Regulation No. 4, serye sa 2021 nga nagpadayon sa pagpatuman sa BDCP.
Subay sa mga resolusyon, ang duha ka barangay opisyal nga gideklara nga drug cleared human sa higpit nga deliberasyon nga gihimo sa komite nga gipangulohan sa direktor sa PDEA- 7.
"The entire officialdom of the Cebu Provincial Government is grateful for the success of these endeavors and the unrelenting support of the local government units in the implementation of the Barangay Drug Clearing Program in cities and municipalities down to the barangay levels”, tipik sa resolusyon nga gipangamahanan ni Bokal Thadeo Jovito Ouano, chairman sa committee on Public Safety, Peace and Order; and Dangerous Drugs Prevention.
“It is the paramount concern of the local government unit to maintain peace and order and to effectively curb the proliferation of dangerous drugs and substance” dugang niini. (BANAT NEWS)