300 ka personnel sa polis, BFP, enforcers ipakatap atol sa Kalag-Kalag

CEBU, Philippines — Gitinguha sa kagamhanan sa Siyudad sa Mandaue ang pagpakatap  sa 300  ka personnel sa kapolisan, kabomberohan, traffic enforcer, barangay tanod ug mga volunteer group alang sa pagbantay sa kahapsay ug kalinaw sa pagtimaan sa Kalag-Kalag  sa Nobyimbre 1 ug 2, 2024.

Ang pagpakatap  sa maong gidaghanon sa mga personnel  maoy nahimong resulta sa gipahigayong pa-inspeksiyon diha  sa mga sementeriyo  sa Siyudad sa Mandaue sa mga sakop sa  City Disaster  Risk Reduction and  Management Office O(CDRRMO) kapolisan, kabomberohan ug buhatan sa Traffic Enforcement Agency of Mandaue (TEAM)  nga  ang ilang mga traffic enforcer maoy gihatasan sa pagmentinar sa hapsay nga dagan sa mga sakyanan ilabi na sa mga dalan nga nagpaingon sa sementeriyo

Si Buddy Ybañez, pangulo sa CDRRMO nagkanayon nga magsugod sa pag-deploy sa  mga personnel karong Oktobre 31, 2024 ug ang 43 nila ka personnel ilang idestino sa mga semeteriyo.

Ang Mandaue City Police Office (MCPO) ug Mandaue City Fire Station mopakatap usab sa ilang nga personnel. Matud ni Ybañez nga sama sa nangaging katuigan ang mga tawo magsugod sa pagtapok sa pagbisita sa mga lubong sa mga nitaliwan na nilang sakop sa pamilya sa Nobyimbre 1 ug 2 o gitawag og adlaw sa mga Santos ug kalag.

Gipasabot ni Ybañez nga ilang gihimo ang hiniusang pagbantay  sa tuyo nga kapugngan ang mga dautang element nga mohimo sa ilang ilegal nga kalihokan atol sa maong adlaw sa pagtimaan sa Kalag-Kalag. (BANAT NEWS)