CEBU, Philippines — Tulo ang patay samtang laing tulo ang naangol sa nahitabong digrasya sa Barangay Road sa Valladolid, Dakbayan sa Carcar kagahapon sa kaadlawon, Domingo, Oktubre 20, 2024 nga naglambigit sa usa ka Sangguniang Kabataan kagawad.
Ang mga namatay mao sila si Klaudet Powao Tobilla, 22, taga Barangay Ocaña; Ian Flores, 21, taga Lamakan, Barangay Valladolid ug si Ronel Medina, 23.
Samtang ang mga naangol mao sila si Alison Jose Santos, 27, taga Barangay Guadalupe; Axel Dela Cerna, 18, taga Upper Lamakan, Valladolid; ug Trisia Nicole Monter, 22, nagpuyo sa Tuyom, Carcar City.
Ang nalambigit nga SUV gimaneho sa Sangguniang Kabataan Councilor sa maong siyudad nga si Rob Joseph Orias.
Sa inisyal nga imbestigasyon sa Carcar City Police Station sa wala pa nahitabo ang trahedya una nang nagkabanggaanay ang duha ka motorsiklo diha sa maong dapit nga naglambigit nilang Flores nga angkas si Dela Cerna sa motor sab nga gimaneho ni Santos ug angkas si Medina.
Nianang tungora sab ang laing motorista nga si Monter kinsa angkas usab si Tobilla nakaagi sa lugar ug nakita ang nahitabo sa duha ka motor mao nga nihunong sila aron motabang sa mga nadisgrasya.
Apan samtang gitabangan ni Monter ug Tobilla ang mga biktima, kalit silang gibanggaan og usa ka Honda CRV nga gimaneho ni Orias.
Nangalagbay ang mga biktima tungod sa kakusog sa pagbangga samtang ang SUV napidpid sa daplin sa dalan.
Gidala silang tanan sa pinakaduol nga tambanan apan silang Tobilla, Flores ug Medina gideklarar nga dead-on-arrival.
Silang Monter, Santos ug Dela Cerna nagpabilin sa ospital ug pulos talandugon ang kahimtang atol sa pagkutlo ning maong balita.
Si Orias gikustodiya karon sa kapulisan sa Carcar City Police Station. Padayon ang imbestigasyon sa kapulisan labot sa maong hitabo. (BANAT NEWS)