CEBU, Philippines — Nadakpan sa kapulisan sa Minglanilla Police Station ang suspek sa pagpamusil niadtong Sabado sa gabii atol sa kapistahan diha sa Purok Dakit, Sitio Fatima, Barangay Linao Lipata Lungsod sa Minglanilla.
Ang suspek mao si Ritchie Reyes, 26, dunay kaipon ug nagpuyo sa maong dapit. Samtang ang biktima mao si Rolan Lucernas Peñas, 32, molupyo sab sa maong dapit.
Gikataho nga dunay bisita sa balay ang suspek niadtong tungora kauban ang biktima ug nagkanta-kanta og videoki.
Sa imbestigasyon sa Minglanilla Police Station sa wala pa nahitabo ang pagpamusil, gikatahong nagkalalis ang suspek ug ang kaipon niini sulod sa kwarto.
Pagkataud-taod nigawas ang suspek sa kwarto ug diretsong giibot ang memory card sa sound system samtang nagkanta-kanta ang ilang mga bisita.
Ang biktima ug kaipon niini uban sa mga bisita nihunong kadali ug nainsulto sa gihimo sa suspek. Hangtud nga nakadesidir sila nga manggawas nalang.
Ang biktima ug ang usa ka testigo gikuyogan og hatud ang ilang suod nga higala paingon sa Barangay Road sa Purok Dakit kay mopauli na sab kini.
Apan samtang sila naglakaw, nabantayan nila ang suspek nga nagpahipi sa ngitngit mao nga ang biktima gikatahong niduol unta kay makigestorya.
Sumala pa sa saksi gikalitan pagpusil sa suspek ang biktima katulo ka higayon nga miresulta sa pagkahagba niini, wala pa matagbaw, giusban kini pagpusil katulo gihapon ka higayon hinungdan sa hinanali niining kamatayon.
Wala pa matumbok sa kapolisan ang hinungdan nganong nasuko og maayo ang suspek ngadto sa iyang silingan nga nisangpot kini sa paghimo sa krimen. (BANAT NEWS)