Kapuyo gipangita tungod sa pagpatay

CEBU, Philippines — Nagpadayon ang manhunt operation sa kapolisan San Remigio Police Station batok sa usa ka driver nga maoy gitumbok nga mipatay niadtong babayeng naputos og samad dinunggaban ang kalawasan nga napalgan sa kalibonan diha sa Barangay Victoria sa maong lungsod pipila ka adlaw na ang nakalabay.

Ang kapolisan sa San Remigio  Police Station nga gipangulohan ni Police  Captain Phil  Restaturo ang miila sa suspetsado nga mao si Peter Arnado, 37, nga taga Sogod nga giingong kapuyo ra sa biktima nga si Jocelyn Ababa, 37  anyos nga taga Negros Oriental.

Sa pakisusi nga gihimo sa kapolisan, nasuta nga ang duha gikan nga mamista sa panimalay sa ilang higala nga taga Barangay Victoria sa Lungsod sa San Remigio.

Apan gikataho nga dunay nahitabong lalis ang duha tungod sa pangabubho sa suspetsado mao nga namauli sila. Ang duha matud pa sa kapolisan pulos nakigbuwag sa ilang kanhi pares ug nagkasabot  sila nga magtipon  ug diha nagpuyo sa Barangay Lahug sa Siyudad sa Sugbo.

Nakit-an na lamang sa pipila ka mga molopyo  sa maong dapit nga nagbuy-od na ang biktima nga patay na ug naligo sa iyang kaugalingon, apan wala na mopakita ang kapuyo niini. (BANAT NEWS)