Dul-an 30 ka motorista gidakop sa HPG-7 diha sa TCH

CEBU, Philippines — Dul-an sa 30 ka mga motorista ang nadakpan sa gihimong operasyon Highway Patrol Group(HPG)-7, Cebu City Mobile Force Company, Prevention, Restoration, Order, Beautiful and Enhancement (PROBE), Road Management Authority ug BPLO sa Red Cliff habig sa Transcentral Highway niadtong Oktubre 18 ug 19, Biyernes ug Sabado.

Sagad sa mga kalapasan nga nahimo sa mga gidakop nga motorista ,  wala marehistro ilang motor, wala'y driver's license ug nakalapas sa Presidential Decree 96 o illegal nga pagbutang og siren o blinkers.

Sigon ni Police Lieutenant Colonel Wilbert Parilla, Regional Chief sa HPG-7 nga kanunay na sila og mohimo og operasyon sa dapit ingon man sa ubang bahin sa TCH aron wala nay mo parking sa kilid sa dalan ug walay mag banking-banking nga maoy sagad hinungdan sa disgrasya.

"Ga expect man ‘ta naay mga mag-inom didto, unya wala man, nakabantay man, wala nay nag estambay and then ang katong BPLO nag inspect sila sa mga naninda didto so naa sila'y gipang isyuhan og show cause, pa reporton to sila sa Lunes," sigon ni Parilla bahin aning mga namaligya og mga ilimnong makahubog diha sa kilid sa TCH.

I-follow up sa HPG-7 ang ordinansahon nga mag dili sa pag parking sa Red Cliff apil na sab ang pagbutang og rumble strips sa lugar. Daghan ang nakadayeg sa gihimo sa HPG-7 sa dapit sanglit daghan na sab ang nangreklamo gumikan sa mga abusadong motorista nga wala maghunahuna nga makaperwisyo sa uban. (BANAT NEWS)