Socmed handler sa CCTO tangtangon

CEBU, Philippines — Nagdumala sa social media page sa Cebu City Transportation Office nga si Ronald Ravina o Inday Nalda ang girekomendar nga tangtangon isip Job Order employee human kini nakaani og daghan pagsaway tungod sa iyang komento sa pagkasakmit sa e-bike driver nga giingong gisakyan sa 4-anyos nga bata ngadto sa tambalanan human kini natumbahan sa railings sa  Pasil Fishport.

Si Ravina adunay post sa iyang social media nga nakapaulbo sa kalagot sa mga netizens lakip usab sa pamilya sa bata nga namatay. Ang maong post dili na kini makita ug naka lock-in na usab ang social media account niini.

Kahinumdoman nga dunay 4-anyos nga batang lalaki nga natumbahan sa railing nga gimuntar sa CCTO sa Pasil Fish Port niadtong adlaw nga Domingo ug dalidaling gikarga og e-bike padung sa tambalanan.

Sa pagbalik sa e-bike gidakop ug gi-impound kini sa mga sakop sa CCTO tungod kay gidili man sila makabiyahe sa maong lugar, apan bisan giunsa og esplikar nga naghatud sila og pasyente, wala sila tuohi ug gidakop gyud.

Ang bata nakabsan sa kinabuhi diha sa tambalanan. Ang CCTO social media napuno sa pagsaway tungod sa hitabo, apan matud pa gitubayan kini ni Ravina hinungdan nisamot kalagot ang mga tawo.

Si Ravina gikatahong nigamit ug dili haum nga pulong nga adunay mga pamalikas, hinungdan nakaabot kini sa mga opisyal sa CCTO.

Ang pangulo sa CCTO nga si Raquel Arce, nitug-an kutob nalang sa Oktobre 18, 2024 ang trabaho ni Ravina sa ilang buhatan ug mangita na usab kini sila og laing modumala unya sa ilang social media page.  Ang kadagkuan sa CCTO daghan na nadawat nga reklamo may kalabutan sa kinaiya ug dinalhan ni Ravina.

Mismo si Mayor Raymond Alvin Garcia nibutyag nga posibleng dili na i-renew ang kontrata ni Ravina human daghan na usab siya ug reklamo bahin niini.  IBM BANAT NEWS