CEBU, Philippines — Sobra usa ka gatos ka polis nga sakop sa Police Regional Office(PRO)-7 nga nadestino sa nagkalain-laing probinsiya ug City Police Offices ang gibalhin una og assignments gumikan kay dunay mga miyembro sa pamilya o kaha paryente nga nanagan sa umaabot nga piniliay sunod tuig.
Sigon ni Police Lieutenant Colonel Gerard Ace Pelare, tigpamaba ni PRO-7 Regional Director Brigadier General Anthony Aberin sa maong ihap, usa niini gikan sa Cebu City Police Office(CCPO), usa sab sa Mandaue City Police Office(MCPO), 39 sa Cebu Police Provincial Office(CPPO), 71 sa Bohol Police Provincial Office(BPPO), 14 sa Negros Oriental Police Provincial Office(NOPPO), usa sa Siquijor Police Provincial Office(SPPO) ug usa sab sa Regional Mobile Force Battalion(RMFB)-7.
Giklaro hinoon ni Pelare nga dili pa final ang maong ihap ug hayan madungagan kini sa review nga himoon.
“Mao ni initial gihatag sa atong inventory, mao nay gihatag nga report, ang atoa man gud mga provincial office ug city police offices nag conduct sila’g inventory so mao ni ilang gihatag nga numbers so mao ni gi-isyuhan og order but dili pata ka ingon nga mao nani final number kay basin og upon review naa pay nakaligtaan,” matud ni Pelare. Ang maong mga polis gibalhin una og laing mga police stations layo sa lugar kung asa nikandidato ang ilang mga paryente.
Gihimug-atan ni Pelare nga ang pagbalhin wala nagpasabot nga manghilabot sila sa eleksyon apan gusto lang ipakita sa PRO-7 ang ilahang political neutrality.
Nasayran nga duna say ipangbalhin nga mga commander nga magduha ka tuig na sa ilang assignment ini og abot sa eleksyon.
“Dili ni siya reshuffling kay it will only involve those mga commanders nga mag two years na siya during the election period kato lang sila maoy maapektuhan….Dili man siya sobra pero mag two years na siya within the election period for example mag two years sa March the he will be transferred”, sigon ni Pelare. IBM BANAT NEWS