CEBU, Philippines — Walay kabag-ohan sa pagpatuman sa dagan sa trapiko sa Dakbayan sa Talisay kalabot sa pag obserba sa kalag-kalag karong tuiga.
Kini ang gibutyag ni Jonathan Tumulak, pangulo sa City of Talisay-Traffic Operation Development Authority (CT-TODA).
Matud ni Tumulak nga nagsugod na sila sa pagpahigayon og tigom kalabot sa kalihokan uban sa nagkalain-laing departamento sa siyudad.
Nagkanayon si Tumulak nga lima ka sementeriyo ang bantayan sa mga enforcer nga masiguro nga lahos-lahos ra ang dagan sa trapiko.
Sa maong lima ka sementeriyo sa siyudad duha niini ang pribado ug tulo ang publiko.
Matud usab ni Tumulak nga dili nila tugotan nga makapaduol ang mga sakyanan diha sa mga pampublikong sementeriyo tungod kay hagip-ot na ang dapit ug aron usab dili kini makababag sa agi-anan sa mga tawo. Sa niaging mga katuigan wala sila’y nakita nga problema sa ilang gipatuman ug nanghinaot si Tumulak nga sama kaniadto ra usab ang mahitabo karong tuiga.
Sa laing bahin, higpit na nga pagpangandam sa kagamhanan sa Siyudad sa Mandaue sa pagtimaan sa kalag-kalag.
Subay sa maong pagpangandam maoy ilang gihimo ang pag-umol og composite team nga maoy nag-inspeksiyon sa pito ka sementeriyo sa siyudad.
Si Buddy Ybañez, head sa City Disaster Risk Reduction and Management Office (CDRRMO) nagkanayon nga ang composite team ang gilangkuban sa kapolisan, kabomberohan ug Traffic Enforcement Agency of Mandaue (TEAM) ug mga opisyal sa kabarangayan
Matud ni Ybañez nga ang kapolisan maoy nagtan-aw alang sa kahapsay ug kalinaw ug sa pagsuta sa gidaghanon sa mga polis nga idestino sa sementeriyo.
Samtang ang kabomberohan ang nagsuta usab sa mga lugar panahon sa pagtimaan sa kalag-kalag nga kalikayan ang sunog.
Ug ang TEAM maoy magbantay aron hapsay ang dagan sa mga sakyanan ug ingon man ang mga lugar nga mahimong ka parkingan sa mga sakyanan.
Sa nasayran si Mayor Glenn Bercede niluwat og kamandoan sa paghimo og mga pagpangandam sa pagtimaan sa kalag-kalag sa pagsiguro nga haspsay ang pagbisita diha sa mga sementeriyo atol sa kalag-kalag. BDB BANAT NEWS