CEBU, Philippines — Giklaro sa mga abogado ni kanhi mayor Michael Rama nga wala pa gihapon kini makadawat sa opisyal nga kopya sa hukom sa Ombudsman kabahin sa pagka-dismiss niini sa katungdanan isip mayor sa Siyudad sa Sugbo.
Sukwahi sa taho nga nitumwaw niadtong Oktubre 3, 2024 human kini niduso sa iyang certificate of candidacy, gipadayag ni Rama nga wala pa maabot sa iyang mga kamot ang maong hukom sa Ombudsman.
Ang mga abogado ni Rama nagkanayon nga niadtong Oktubre 5, 2024 personal nga niadto sa giabangan nga balay ni Rama diha sa Espina compound sa dalan B. Rodriguez ang bag-ong hepe sa kapolisan sa siyudad nga si Police Colonel Antonietto Cañete uban ang laing pito ngadto sa napulo ka polis diin nagbilin og sobre nga giingong anaa niini ang sulat gikan sa Ombudsman ug ang maong sulat gibilin lang sa ilawom sa gate.
Nasayran nga ang maong compound adunay lima ka balay nga adunay mga nagpuyo ug adunay kaugalingon nga mga buhatan.
Matud sa legal counsel ni Rama nga ang maong buhat dili makatarunganon ug kinahanglan nga gikan gyud sa Ombudsman ang angay nga mopadangat sa sulat ngadto sa hingtungdan.
Sayo pa, si Cañete gitudlo isip hepe sa kapolisan sa siyudad niadtong buwan Septiyembre niining tuiga kinsa si Mayor Raymond Alvin Garcia ang nagtudlo kaniya nga mohupot sa maong posisyon.
Gipahibawo usab sa legal counsel ni Rama nga nipahigayon sila og pakisusi mahitungod sa kopya sa desisyon nga gi-post diha sa Facebook diin nasayran nila nga dili gikan sa Ombudsman ang nipirma ug ni-aproba sa maong desisyon.
Ang nipirma sa pag-aproba sa maong desisyon mao ang deputy Ombudsman lang nga unta ang posisyon pagka-mayor sa siyudad makonsidera nga taas nga pwesto sa gobiyerno ug ubos sa pamalaod ug patakaran sa Ombudsman kinahanglan nga ang
Ombudsman maoy mopirma tungod kay mayor ang hingtungdan.
Bisan og wala pa makadawat og kopya sa desisyon si Rama aktibo ang mga abogado niini nga niduso og motion for reconsideration ngadto sa Ombudsman niadtong Oktubre 15, 2024 aron hatagan og kahigayonan nga ibasura sa maong buhatan ang desisyon batok kang Rama.
Niadtong Oktubre 7, 2024 niduso og kaso ang mga abogado ni Rama ngadto sa Korte Suprema alang sa pagpahunong sa Comelec sa giingong pagyatak sa katungod sa pagkandidato ug dili makataronganong pagpataktak sa pangalan sa kandidato diha sa balota ug otomatik nga diskwalipikasyon. BDB BANAT NEWS