CEBU, Philippines — Nagtingkagol sa prisuhan ang usa ka bana ug ang giingong kabit niini human silang duha gipadakop sa asawa kay nasakpan sulod sa lodging house sa Barangay Pitalo, Lungsod sa San Fernando niadtong Miyerkules sa gabii, Oktubre 16, 2024.
Ang bana nag edad og 37-anyos ug taga Barangay Perrelos, dakbayan sa Carcar samtang ang giingong kabit nag-edad og 30-anyos ug taga Barangay Mantuyong, Dakbayan sa Mandaue.
Samtang ang asawa nga nagpadakop nag-edad og 35-anyos ug nagtrabaho sa Cebu City.
Nagkanayon si Police Major John Christian Bautista ang asawa niadto sa ilang buhatan ug nagpakitabang human masayod nga iyang bana ug kabit niini nga nanulod og lodging house. Pagabot sa mga polis sa lodging house nasakpan gyud ang duha nga nagtagay sa sayop nga kalipay diha sa lawak hinungdan nga silang duha gipangdakop.
Nasuta nga nakabantay ang asawa nga adunay babaye ang iyahang bana kay matag motambong na ang asawa sa trabaho, molakaw sab ang bana mao nga gisundan niya kini anang adlawa hangtud nasakpan. Ang duha parehong kasohan sa asawa. — IBM BANAT NEWS