P3 milyong drugas nasakmit
CEBU, Philippines — Miabot ngadto sa 108 ka mga tawo ang nasikop sa Simultaneous Anti-Criminality Law Enforcement Operation kon SACLEO nga gihimo sa kapolisan sa Central Visayas gikan sa October 14-16, 2024. Base sa gibana-bana nga kantidad sa drugas mikabat ngadto sa P3,037,764.00 ang nasakmit nga shabu nga mitimbang usab og 446.73 grams.
104 ka mga wanted person ang nasikop diin 17 niini most wanted person ug 87 ang other wanted person. 79 ka operation ang gihimo may labut sa loose firearms diin 81 ang gitahan ug nasakmit nga anaay 11 ang nadakpan ug napasakaan og kaso.
Sa illegal gambling, moabot sa 51 ka operations ang ilang nahimo diin 101 ang nadakpan og 51 ang napasakaan og kaso.
Sa laing bahin mokabat sa P538, 968.00 ang kantidad sa 79.26 gramo nga shabu nga nasakmit sa kapolisan sa Lapu-Lapu City Police Office (LCPO) sa usa ka semana nilang operasyon nga nagsugod niadtong Oktubre 7 hangtud sa Oktubre 13, 2024. Nadakpan sa operasyon ang napulo ka pusher sa siyam ka buy bust operation.
Si Police Lieutenant Colonel Christian Torres, tigpamaba sa LCPO miingon nga ilang pa karon nga gisusi ang mga dagkong supplier og shabu sa lugar.
Samtang sa ilegal nga sugal nga naglakip sa ilegal nga suwertres nadakpan ang 15 ka mga nalambigit niini. Nasakmit gikan sa mga dinakpan ang P2,413.00 nga kuwarta ug gambling paraphernalia. — MEL BANAT NEWS
- Latest
