Mga ginikanan pabantayan ang mga anak

CEBU, Philippines — Giawhag sa Cebu City Police Office(CCPO) ang mga ginikanan nga bantayan ang ilang mga anak aron dili na masubli pa ang nahitabo sa 4-anyos nga batang lalake nga si Crismark Sandoval.

Si Crismark nakabsan sa kinabuhi human nadat-ugan og railings nga gibutang sa Pasil Fish Port sa Barangay Suba, siyudad sa Sugbo ug nabuak ang ulo.  Matod ni Police Lieutenant Colonel Maria Theresa Macatangay, Deputy City Director for Operations ug tigpamaba sa Cebu City Police Office nga dili pasagdan ang mga bata nga bisan asa lang magduwa.

Nasayran ang railings gibutang sa maong dapit isip ali sa fish port.

Gipaabot sa kapolisan ngadto sa Local Government Unit ang panghitabo sanglit nasayran nila nga ang property iya sa LGU.  Ang Cebu City Government nihimo na sab og imbestigasyon sa maong hitabo ug kun mapamatud-an nga dunay nagpabaya aduna gyuy manubag.

Giabaga na sa siyudad ang tanang bayrunon sa ospital apil na ang pagpalubong sa bata. — MEL BANAT NEWS