CEBU, Philippines — Patay ang usa ka 25-anyos nga lalaki human kini pusila samtang nag-ayo og motorsiklo diha sa Sitio Ilaya, Barangay Kalunasan, Siyudad sa Sugbo niadtong Martes sa gabii. Ang biktima mao si Johnrel Ocay Dela Cerna, walay trabaho, residente sa nahisgutang lugar nakaangkon og samad pinusilan sa ibabaw’ng bahin sa likod ug dughan.
Base sa imbestigasyon sa Guadalupe Police Station ang biktima nitabang sa iyahang igsuon nga si Joenel Dela Cerna sa pag-ayo og ligid sa motorsiklo.
Usa ka lalaki ang kalit nga nitungha ug gipusil niini ang biktima tulo ka higayon ug human sa pagpamusil daling nisibat ang kriminal palayo sa lugar.
Si Police Major Miles Damoslog, hepe sa Guadalupe Police Station nagkanayon nga personal nga bangi ang gitan-aw nila nga motibo sa maong krimen.
Gibutyag ni Damoslog nga nakadawat sila og taho nga giingong nalambigit sa ilegal nga drugas ang kriminal apan ilaha pa kining susihon.
"Meron tayong information na involve daw sa drugs pero yun nga sabi ko hearsay pa lang yan for validation pa", matud ni Damoslog. Samtang ang biktima niadtong buwan sa Agosto niining tuiga nadakpan sa kapolisan ang biktima tungod sa ilegal nga sugal.
"Walang death threats pero may mga previous away siya", dugang ni Damoslog. (BANAT NEWS)