CEBU, Philippines — Nipadayag sa iyang tumang kaguol ang inahan sa 4-anyos nga bata kinsa namatay tungod kay nabuak ang ulo human kini natumbahan sa railings diha sa Pasil Fish Ports, Barangay Suba, Siyudad sa Sugbo sa niaging adlaw.
Matud ni Christina Basio inahan ni Crismark Sandoval nga dihang nahitabo ang aksidente didto siya sa Lungsod sa Minglanilla tungod kay diha man siya sa maong lugar nagtrabaho.
Human siya nasayod sa nahitabo sa iyang kinamanghurang anak nideretso siya sa Cebu City Medical Center ug sa iyang pag-abot nakita nalang niini ang iyahang anak nga gi-pump na.
Si Christina aduna kini tulo ka anak ug ang biktima maoy kinamanghuran.
Karong Nobiyembre 7, 2024 unta magsaulog iyahang adlaw’ng natawhan si Crismark ug nisaad si Christina nga moadto sila og Jollibee ug nihangyo usab kini nga kon makagawas na ang ilang amahan mangaligo sila og swimming pool.
Nunot niini, ang Department of Social Welfare and Services (DSWS) sa Dakbayan sa Sugbo nipadangat na sa ilang ayuda ngadto sa pamilya ni Crismark.
Kini ang gibutyag ni Portia Basmayor, pangulo sa DSWS.
Matud ni Basmayor nga nihatag na sila og P10 mil nga ayuda aron adunay magasto sa haya sa bata ug nihatag usab sila og bugas, delata, kape, ug pa.
Gibutyag ni Basmayor nga ang DSWS usab ang mobayad alang sa lungon ug nitso sa bata.
Atol sa lubong, ang DSWS usab maoy mopahiluna sa bus nga kasakyan sa mohatud ug lakip usab sa snacks.
Nakig-alayon usab ang DSWS sa huwes ug Cebu City Jail aron makahatud ang amahan sa bata kinsa kasamtangan karong napriso. (BANAT NEWS)