HPG mohimo og programa paglikay sa aksidente

CEBU, Philippines — Ang Highway Patrol Group-7 mohimo og mga programa aron malikayan ang mga aksidente nga mokalas og kinabuhi.

Kini human nga ang HPG-7 nakadawat og mga taho kabahin sa mga nahitabong aksidente diha sa Transcentral Highway

Matud ni Police Lieutenant Colonel Wilbert Parilla, hepe sa HPG-7 usa sa ilang gihimo mao ang pagpatawag sa tanang organization sa mga mahiligon og motorsiklo diin ilaha kining gitawag og “Ride Carefully TCH”.

Dili lang big bikes apan apil na kadtong mga gagmay nga motorsiklo nga grupo ug gipahimangnoan nga dili race track ang TCH.

Gawas niini,  sa ilang meeting uban ang traffic board sa Cebu City Government nirekomendar si Parilla nga magbuhat og ordinansa sa Redcliff Area nga dili pahunongan og bisan unsang klase nga sakyanan ug wala nay tawo nga pwede mag-standby.

Ang HPG-7 nakadawat og taho nga daghan ang mag-estambay sa dapit ug mag-inom kini.

Diha usab sa maong lugar daghan ang nahitabong aksidente tungod kay daghan usab ang mag-parking hinungdan nga gihangyo nila ang Department of Public Works and Highways (DPWH) Cebu City nga butangan og rumble strips ang karsada aron mo menor ang mga motorsita nga moagi.

Nakig-alayon na usab ang HPG-7 sa Road Management Authority (RMA) ug ubang ahensiya sa gobiyerno nga mohimo sila og operations ilabi na sa reckless driving aron malikayan ang mga disgrasya. (BANAT NEWS)