Mayor sa Carmen nitubag sa reklamo sa usa ka negosyante
CEBU, Philippines — Andam nga tubagon ni mayor Carlo Villamor sa lungsod sa Carmen, ang reklamo sa usa ka negosyante nga miingon nga wala ma isyuhi og permit alang sa iyang negosyo.
Gipasabot ni Villamor nga wala siya moluwat og permit ngadto sa usa ka negosyante tungod sa kakulang sa gipangayo nga papel nga rekisitos pagrenew sa patigayon niini.
Pinaagi sa iyang Facebook page gipadangat ni Villamor ang iyang habig sa kasong grave misconduct ug graft charges nga gipasaka sa usa ka negosyante nga si Richard Rendal Sarad, residente sa Barangay Cogon East Carmen.
Si Sarad nagnegosyo og bugas mais ug adunay kan-anan namasangil nga si Villamor nagdumili pag-isyu og permit pinaagi sa pagpangayo og dokumento nga wala sa listahan sa municipal treasurer nga rekisitos alang sa pagkuha og permit.
Si Villamor nagkanayon katungod niya nga dili moluwat og permit kon wala gyud ma comply ang mga papeles nga angay sundon ug isumiter.
"Wala mi ni issue kay base sa atong BUSINESS PERMIT AND LICENSING OFFICE ang data kulangan gyod" matud sa Mayor kinsa nidugang nga Agosto pa lang nagsugod ang bag-ong BPLO sa lungsod nga maoy gitahasan pag review sa tanang negosyo sa lungsod.
Si Sarad nagkanayon nga tuig 2019, 2020 ug 2021 nakarenew pa siya apan niadtong 2022 ug 2023 bisan og na comply niya ang mga papel base sa listahan sa municipal treasurer alang sa renewal, wala siya gi-isyuhan sa mayor. (BANAT NEWS)
- Latest
