Estero de Parian ilakip sa pag-pedestrianize

CEBU, Philippines — Nagplano ang City Planning and Development Office nga ilakip ang Estero de Parian sa pag-pedestrianize sa downtown area.

Apan matud pa sa labaw sa CPDO nga si Architect Joseph Michael “Yumi” Espina nga dili pa kini mahitabo dayon tungod kay ang Task Force Gubat sa Baha nagpadayon pa sa pag-reclaim sa tulo ka metros nga easement sa maong sapa. Sa pagkakaron, tutokan una ang unang hugna sa plano sa pedestrianization nga mao ang sa City Hall Square o ang kadalanan nga nagpalibot sa Cebu City Hall ug uban pa nga mga istruktura. Dugang plano niini ang butangan og ruta alang sa mga electric tricycle o e-trike.

Ang ‘pedestrianization’ usa kini ka proseso sa pag-usab sa usa ka dalan aron magamit sa mga pedestrian pinaagi sa street dieting o pagpakunhod sa moagi nga motorsiklo.

Ang pedestrianization sa downtown o sa heritage district sa syudad himoon sa tulo ka hugna.

Human sa City Hall Square, isunod ang dalan nga nagpalibot sa Plaza Independencia lakip na ang nagpaingon sa mga pier aron nga mapahimuslan sa manglargahay.

Pabutangan usab og ruta gikan sa Pier 1 paingon sa downtown diin legal nga makabyahe ang mga e-trike ug adunay mga terminal nga ibutang aron nga dili maghuot ang dagan sa trapiko ugaling tugutan na pagbyahe ang mga e-trike. Ang katapusang hugna sa pedestrianization mao ang sa Estero de Parian ilabi na sa gi-reclaim nga three-meter easement.

Kun malampuson ang pag-pedestrianized niini, konektado na ang downtown sa “Link to the Port” feature sa nagpadayong gitukod nga Cebu Bus Rapid Transit (CBRT) project.

Dugang plano nga pagahimoon sa Estero de Parian mao ang pag-usab sa lugar kun diin nag-okupar ang mga informal settlers ug easement violators ug himoon kini nga “active spaces” pinaagi sa pagtukod og mga lokal nga negosyo. Ang Estero de Parian nagsugod kini sa dalan Colon paingon na sa Pier 2 diin maagian niini ang Barangay Sto. Niño, Barangay Parian, ug Barangay San Roque.

Ang ubang bahin nga lakip sa Estero de Parian nga mao ang Cuenco Avenue ug Sergio Osmena Boulevard himuon kining kasuruyan aron mapalambo pa ang turismo dinhi sa siyudad sa Sugbo. (BANAT NEWS)