CEBU, Philippines — Gikompirmar ug gianunsyo kagahapon ni Archbishop Jose Palma sa Archdiocese of Cebu ang pagtukod ni Pope Francis didto sa Vatican og bag-ong diocese dinhi sa Pilipinas nga mao ang Diocese of Prosperidad sa Agusan Region. Ang Santo Papa miinstalar kang Bishop Ruben Labajo,DD, isip labing unang Obispo sa maong diyosisis.
Ang pagpahibalo ni Palma gipahigayon kini sulod sa Archbishop’s Palace nga gitambongan mismo ni Labajo, Malolos Bishop Dennis Villarojo, uban mga kaobispohan, monsignors, mga kaparian ug pipila ka mga layko. Ang bag-ong Diocese naglangkob sa Agusan del Sur , epektibo na kining gibuwag gikan sa 57-anyos nga Diocese of Butuan nga ang ginsakupan mao nalang ang Agusan Del Norte. Ang decision sa Santo papa sa pagtunga sa Diocese of Butuan ngadto sa duha nagsukad sa petisyon ni Bishop Cosme Damian Almedilla sa Butuan niadtong 2023.
Ang 58-anyos nga si Labajo, giordinahan isip pari niadtong Hunyo 10, 1994 sa Archdiocese of Cebu ug niadtong Hunyo 2022 gitudlo ni Pope Francis isip Auxiliary Bishop ug giordinahan sa pagka Episcopate niadtong Agusto 19, 2022. Si Labajo sa iyang bahin mapasalamaton sa tanan mga obispo, kaparian, ug sa mga parokya nga iyang naagian sama sa Santa Fe, Tabunok, Balamban, Cebu Metropolitan Cathedral ug karon kasamtangan sa Sto. Rosario Parish.
Si Labajo padayon sa iyang motto nga “To walk humbly before God.”— IBM BANAT NEWS