CEBU, Philippines — Ang kagamhanan sa Dakbayan sa Toledo mitanyag og P100 mil nga ganti para sa makatudlo sa gitagoan sa suspetsado sa paglugos ug pagpatay sa 17-anyos niadtong nakalabay nga buwan.
Si Toledo City Mayor Marjorie “Joie” Perales miingon nga nadesisyonan nila nga mohatag ug reward money sa makatumbok kung asa si Loren Larot alyas Richard Cabugsa, 43. Base sa rekord sa kapolisan, si Larot mao sab ang nagpatay sa kaugalingon niyang amahan nga retiradong polis didto sa Mindanao sa miaging tuig. Ang suspetsado maoy gituohang katapusan nga gikauban sa biktima base sa kuha sa CCTV camera diha sa lodging house diin nakaplagan ang biktima nga gigaid ug wa nay kinabuhi.
Si Perales niawhag sa mgaa adunay kasayuran nga motaho ngadto sa kapulisan aron masikop gilayon ang maong suspetsado. - IBM BANAT NEWS