Bata natumbaha’g railing patay

CEBU, Philippines — Usa ka 4-anyos nga batang lalake ang nakabsan sa kinabuhi human nabuak ang ulo kay nadat-ugan sa railings nga gibutang diha sa  Pasil Fish Port, Barangay Suba, siyudad sa Sugbo niadtong Oktubre 14, 2024, Lunes sa alas 4:20 sa hapon.

Ang namatay nagpuyo sa Block 3, Belgium Street, Barangay Suba ning siyudad.  Sigon sa iyaan sa bata nga si Erica Tagsip, dunay mga bata nga nagduwa sa railings samtang iyahang pag-umangkon nagsandig ra didto.

Dihang namingaw na nagpabilin gihapon ang bata dayon dunay usa ka bata nga nikatkat ug sa pagnaog niini natumba kalit ang railings nga giingong depektoso kay walay tiil ang pikas.

Nakadagan matod pa ang bata apan naabtan gyud kini sa railings hinungdan nga naigo ang ulo niini.  Dali kining gitabang sa mga tawo ug gikarga og e-bike  padung sa Cebu City Medical Center(CCMC) apan gi-refer sila sa Vicente Sotto Memorial Medical Center(VSMMC) gumikan grabe ang samad sa ulo niini.  Pag-abot matod nila sa VSMMC ang oxygen ug ginhawa sa bata gaabot.

Mo-responde pa ang bata dihang gikusi-kusi sa doctor apan pagka ala-una sa kaadlawon kagahapon, Martes, Oktubre 15 nabugtoan kini sa ginhawa.

Nasagmuyo sab sila tungod kay imbes nagkuha ra sila sa ilang kauban aron maoy mopuli unta sa unang nagbantay kay dili kahibawo mo-pump sa pasyente apan gidakop sila sa mga traffic enforcers  bisan ilang gihangyo kay emerhensiya, ang rason matud pa wala silay dalang pasyente atol sa pagdakop.

“Kanang e-bike mao na among gisakyana sa akong ig-agaw padong didto niya nibalik, unya nibalik ikaduha kay akong Mama dili man kahibawo mo-pump, akong ig-agaw raman ang kahibawo mo-pump.  Ilang gidakop unya among gi-explain nga kritikal ang among pasyente kay ang nagbantay dili kahibawo mokupot og pump, gidakop man gyud nila kay wala kuno ang pasyente, ,” asoy ni Erica.

Nasayran nga wala dayon ma report sa Sawang Calero Police Station 6 sa Cebu City Police Office(CCPO) ang hitabo. Kagahapon na niadto sa police station ang pamilya maong nakahimo og imbestigasyon si Police Master Sgt. Maurice Caldosa.

Ang pangulo sa Cebu City Transportation Office nga si Raquel Bohol-Arce miingon nga mohimo sila og imbestigasyon bahin sa alegasyon sa giingong pagdakop sa e-bike. Matud niya, dili pwedeng dakpon kun dunay kargang pasahero padung sa tambalanan.

Sumala pa ni Arce kung mapamatud-an sab nga gidakop kini sa dihang pauli na gikan sa tambalanan  ilaha ra gyud kining buhian.

Samtang bahin sa depektosong railings, si Arce nagkanayon nga iya kini sa ilang buhatan ug gibutang kini didto tungod sa hangyo sa Market Authority aron di makasud ang dagkong trak. Ang maong railings gipadaplin ra kilid sa dalan atol sa pagkahitabo.

Si Arce nagkanayon nga obligasyon unta sa mga ginikanan ang pagbadlong sa ilang mga anak ilabi na kun gagmay pa kaayo.—   IBM BANAT NEWS