CEBU, Philippines — Gi-implementar na sa Criminal Investigation and Detection Group (CIDG) -7 ang Warrant to Search, Seize and Examine computer data sa gidudahang POGO hub sa Sitio Kalingking, Barangay Saavedra, Lungsod sa Moalboal niadtong Lunes sa gabii, Oktubre 14, 2024.
Si Presiding Judge Ruben Altubar sa 7th Regional Trial Court, Branch 29, Toledo City ang nag-issue sa warrant. Sa maong lugar nasakpan ang 38 ka undocumented Chinese nationals atol sa fire safety inspection sa kabomberohan sa maong lungsod niadtong Oktubre 9, 2024.
Human nasusi sa kapolisan ug ubang ahensiya sa lungsod, nadiskubrehan ang nahisgotang mga 34 ka computers, unom ka sakyanan ug 226 ka mga cellphones, upat ka laptops, nga gihulagway sa Police Regional Office(PRO)-7 indikasyon nga kini nalambigit sa POGO.
"The joint team decided to apply for search warrant tan-awon tong data, computer data nga naa sa mga computer sets nga recover, they were granted search warrant and actually they have implemented it I think last night and this is an ongoing investigation that we are conducting and of course this is pursuant to our very aggressive campaign against illegal POGO and POGO like activities along with other criminal activities in Central Visayas," sigon ni Lt. Col. Ace Pelare. Pasakaan sab og kasong kalapasan sa Alien Registration Act of 1950 ang mga langyaw human wala sila makapakita og mga dokumento sa ilang pagsulod sa Pilipinas. Gituohang gikan sila sa mga POGO hubs nga una nang gironda sa mga otoridad sa nagkadaiyang mga lugar sa nasud.- IBM BANAT NEWS