CEBU, Philippines — Ang Department of Labor and Employment (DOLE)-7 nakapagawas na og kinatibuk-ang P55.1 milyones nga monetary awards ngadto sa 1,667 ka apektadong mga trabahante sa Central Visayas pinaagi sa Single Entry Approach (SEnA) nga programa sa Septiyembre 2024. Sukad sa buwan sa Enero hangtud sa Septiyembre niining tuiga ang buhatan pinaagi sa SEnA Unit niini uban sa field offices naglihok sa 1,862 ka requests for assistance (RFAs) diin 1,828 ang na-dispose ug 1,435 ang nahusay.
Sa Probinsiya sa Sugbo ug Tri-Cities nga gilangkuban sa Cebu, Mandaue, ug Lapu-Lapu niabot sa 1,511 ka RFAs ang na-handle sa buhatan diin 1,441 niini o 96.52 porsyento ang nahusay diin P47.3 milyones ang nahatag ngadto sa 1,334 ka trabahante. Sa Negros Oriental, ang Single Entry Assistance Officers (SEADOs) ni-handle og 227 RFAs, 190 niini ang nahusay o tukma sa 89.20 porsyento nga settlement rate. Nikabat ngadto sa P6.2 milyones ang nahatag sa 207 ka mga trabahante.
Samtang sa Probinsya sa Bohol niabot sa 90 ka trabahante ang nahatagan og PHP1.1 milyon human nahusay ang 87.65 porsyento o 71 sa 83 ka RFAs.
Human sa mandatory conference sa Siquijor 36 ka trabahante ang nakabenipisyo sa PHP568,235.83 nga monetary awards. Kini human nahusay sa field office ang 34 sa 41 ka RFAs o 85.93 porsyento nga settlement rate. BDB BANAT NEWS