CEBU, Philippines — Hingusgan sa Cebu City Anti-Mendicancy Board ang balaod nga dakpon ang masakpan nga manghatag og limos diha sa kadalanan.
Gipahibawo ni Dr. Lucille Mercado nga ilaha nang tinud-on ang pagpatuman sa programa subay sa City Ordinance 1631 diin ang makalapas niini makabayad og multa nga P1000 o upat ka oras nga community service.
Magpakatap usab sila og dugang tawo diha sa kadalanan aron ma-monitor ug mabantayan ang lihok sa mga libudsuroy.
Ilusad usab nila ang ilang bag-ong slogan nga “Ang Paghatag Maayo Apan Sa Kadalanan Dili Husto” ug magpakatap sila og stickers diha sa mga publikong lugar.
Sa laing bahin, banhawon usab sa Anti-Mendicancy Board ang “Pabalhin Program” diin maghatag kini og katulgan sa mga nasakpan nga nangatulog diha daplin sa kadalanan.
Pakatulgon sila ngadto sa South Road Properties diin gihimong quarters sa mga doktor panahon sa COVID-19 pandemic. Tumong sa maong programa ang pagpamenos sa mga mangatulog diha sa kadalanan sa siyudad.
Gibutyag ni Mercado nga ang mga tulog sa kadalanan kuhaon sila matag alas 7:00 sa gabii ug tugotan nga makaligo o makapanglaba ug sa sunod adlaw ibalik sila sa lugar diin sila buot nga magpahatud.
Giklaro ni Mercado nga wala sila’y ihatag nga pagkaon alang sa ilang pangdad-on diha sa SRP. BDB BANAT NEWS