CEBU, Philippines — Atol sa flag ceremony sa Plaza Sugbo kagahapon, gipasidunggan ug gipasalamatan ni Mayor Raymond Alvin Garcia ang PNP, PDEA-7, Office of the City Civil Registrar, Cebu City Office for Substance Abuse and Prevention, Public Information Office, ug pipila ka mga indibidwal tungod sa dungog nga ilang nahatag sa dakbayan.
Gipasalamatan ni Garcia ang Philippine National Police ug ang Philippine Drug Enforcement Agency-7 human nga nakasakmit og lima ka kilo nga ginadiling drugas nga nagbalor og P34 milyones niadtong Oktubre 11 sa Barangay Carreta nga miresulta sa pagkasikop sa 51 anyos nga babaye nga taga Barangay Cogon Pardo.
Gipasidunggan usab si Atty. Evangeline Abatayo nga maoy pangu sa Office of the City Civil Registrar kay ilang naangkon ang ikaupat nga dapit sa “2023 Outstanding Local Civil Registry Office” super extra-large category, niadtong October 9, 2024 didto sa kauluhan.
Midaog sab ang Cebu City Office for Substance Abuse and Prevention (COSAP) nga gidumala ni Jonah John Rodriguez sa “Gawad Kaagapay Award” nga gipasiugdahan sa Department of Health.
Lakip sab sa gipasidunggan ang Public Information Office (PIO) human kini nakakuha sa ikatulong dapit sa Central Visayas Regional Development Council (RDC) vlog contest atol sa pagsaulog sa RDC Week niadtong Oktubre 7 sa DepEd Ecotech Center sa Sudlon, Barangay Lahug.
Pipila ka mga indibidwal gipasidunggan usab sa mayor nga mao sila si Kiersten Candice Sy sa Cebu City National Science High School nga nakaangkon og award atol sa SIAM International Math and Science Olympics didto sa Bangkok, Thailand ug ang 11 anyos nga si Louise Nicole Rosit Calabroso sa University of San Carlos nga nakoronahan isip “Little Miss Global Sensational Queen Philippines 2024” ug “Little Miss Global Philippines 2024” sa bag-o lang natapos nga Kids & Teens Pageant Global Philippines sa Manila, niadtong Oktubre 6. (BANAT NEWS)