Mga empleyado sa PAGCOR dili matawag nga kawani sa gobiyerno?

CEBU, Philippines — Ang Korte Suprema nihukom nga ang mga trabahante nga gi-hire sa Philippine Amusement and Gaming Corporation (PAGCOR) ubos sa contract of service o job order dili ikonsiderar nga mga kawani sa gobiyerno ubos sa balaod sa Civil Service Commission (CSC).

Base sa giluwatan nga desisyon ni Associate Justice Ramon Paul Hernando nagkanayon nga ang first division sa Korte Suprema nihukom nga ang usa ka grupo sa mga trabahante nga nagtrabaho isip kusinero, waiter, dishwasher, ug uban pa sa hotel ug restaurant nga negosyo sa PAGCOR matawag og contract of service o job order workers sa gobiyerno, apan dili mga kawani sa gobiyerno nga sakop sa Civil Service Laws and Regulations.

Ang pagluwat sa maong desisyon gumikan sa kaso nga naglambigit kang Mark Abadilla ug ubang mga trabahante nga nipirma og mga kontrata alang sa fixed terms nga usahay gi-renew apan ang mga kontrata nag-ingon nga sila mga job order worker.

Human nga wala ma-renew ang ilang mga kontrata nunot sa operational transition sa PAGCOR nipasaka sila og illegal dismissal complaint ngadto sa CSC Regional Office (CSCRO)-VI ug nangangkon nga sila mga regular nga empleyado.

Apan gibasura sa CSC ang ilang reklamo ug gipamatud-an sa Court of Appeals (CA)  nga si Abadilla ug ang uban pa dili mga regular nga empleyado ubos sa civil service ug tungod niini dili sila sakop sa mga balaod, lagda, ug regulasyon sa CSC.

Gipasabot sa Korte Suprema nga walay employer-employee relationship tali sa gobiyerno ug sa mga job order worker kansang mga serbisyo wala gikonsiderar nga serbisyo sa gobiyerno, base sa klase sa ilang mga katungdanan, organizational ranking, lebel sa bayad, ug kontrata sa trabaho.

Dugang pa sa korte nga ubos sa CSC-COA-Department of Budget and Management Joint Circular No. 1 klaro nga gipadayag nga ang mga contract of service o job order worker dili sakop sa mga balaod ug regulasyon sa civil service.