CEBU, Philippines — Karon nga aduna nay bag-ong chairman ang Metro Cebu Water District (MCWD) si Cebu City Mayor Raymond Alvin Garcia nanghinaot nga dili na unta mahitabo ang panagbangi sulod sa management ug nidugang nga angay lang magtinabangay ang mga sakop sa board. Opisyal na nga gihulipan ni Engineer Miguelito Pato si Attoryney Jose Daluz III isip chairman sa MCWD.
Matud ni Garcia nga mahuman na unta ang termino ni Pato karong buwan sa Disyembre.
Apan unom ka buwan sa dili pa mahuman ang iyang termino gitugotan na nga ma- reappoint kini hinungdan nga siya usab ang mapili isip MCWD chairman.
“You should be aware nga wala jud koy labot anang chairmanship. Ang board of directors gyud ang mopili sa ilang mga opisyales”, padayag ni Garcia.
Ang bag-ong sakop sa board nga si Attorney Ferdinand Pepito maoy nihulip sa wala pa mahuman nga termino ni Daluz hangtud karong Disyembre. Si Daluz opisyal nga nikanaog isip MCWD chairman niadtong Oktubre 8, 2024 dungan sa iyang pag-file og certificate of candidacy pagka-bise mayor sa Dakbayan sa Sugbo.
Sa pagkakaron, adunay tulo ka sakop sa board nga napili kinsa si Pato maoy chairman, Jodelyn Mae Seno isip vice chairman samtang si Pepito maoy napili isip secretary.
Ug gumikan niini, kinahanglang motudlo pa si Garcia og laing duha ka sakop sa board uban ni Doctor Carlo Maamo samtang wala pa siya’y gihinganlan nga ikaupat nga board member.
Sa maong mga kausaban gitataw ni Garcia nga angay nga ang mga sakop sa board adunay collective nga desisyon ug maghiusa sa pagpadagan sa water district nga nagsuplay sa Dakbayan sa Sugbo.
Si Garcia kinsa adunay otoridad sa pagtudlo sa MCWD board nagkanayon nga gusto niya nga adunay lain-laing mga sakop sa board aron adunay lain-lain usab nga mga point of views. (BANAT NEWS)