Hubog natagak sa pangpang, patay

CEBU, Philippines — Nakabsan gyud sa kinabuhi ang lalake nga nahagbong matud pa sa pangpang sa Sitio Olivo Valley, Barangay Buhisan, siyudad sa Sugbo kagahapon sa ala-una sa kaadlawon, Oktubre 14, 2024.

Ang namatay mao si Jerry Radaza Gonzaga, 50, residente sa  Barangay Marigondon, Dakbayan sa Lapu-Lapu.

Nasayran nga sa adlaw’ng Domingo hubog na kaayo ang biktima gikan namista ug nakig-inom  sa iyahang mga kabanay sa maong dapit.

Sa impormasyon sa Labangon Police Station sa Cebu City Police Office human sa inom ang biktima nagsusapinday nga naglakaw padung  na pauli ug diha niagi sa kilid sa pangpang.

Apan nakadungog nalang usa sa mga ig-agaw niini og kusog nga lagubo gikan sa pangpang ug dihang ilang gisusi didto nakit-an kini nga wala nay panimuot.

Nanawag dayon og ambulansiya ang mga kabanay ug gidala dayon kini sa Cebu City Medical Center apan nabugtuan gyud sa kinabuhi. (BANAT NEWS)