Giapas ug gitiwasan

CEBU, Philippines — Patay ang amahan samtang kritikal ang anak niini human sila gipusil og matud pa og usa ka ex-convict diha sa Sitio Tunga, Barangay Cantuod, Lungsod sa Balamban niadtong Domingo sa gabii.

Ang namatay nga amahan mao si Jasper Tito Zorilla, 46, residente sa Barangay Owak, Lungsod sa Asturias ug ang anak niini nga kritikal mao si Jericho, 24 anyos.

Ang amahang Zorilla dead-on-arrival sa Balamban District Hospital samtang ang anak niini gidala sa Vicente Sotto Memorial Medical Center gumikan kay talandugon ang kahimtang niini.

Nailhan na sa kapulisan ang suspek nga taga Barangay Singing sa Lungsod sa Balamban apan wala una nganli kay padayon pa kini nga pagpangita sa kapulisan kay dali kining misibat human ang krimen.

Nagkanayon si Police Lieutenant Colonel Julius Garcia, hepe sa Balamban Police Station miingon nga ang mga biktima ug ang suspek aduna nay panagbangi daan kay supak ang pamilya sa mga biktima sa relasyon niini ngadto sa bilas nga manghod sa asawa sa biktima nga namatay.

Nasayran nga ang amahan nag-estambay sa ilang terrace sa dihang naabot ang suspek sakay og motorsiklo ug mihunong tungod sa biktima.

Nagkalalis pa ang namatay ug ang suspek apan nisangpot kini sa pagpamusil. Ang asawa sa biktima nga si Florielyn ug ang anak niini nga Jericho daling mitabang sa ilang padre de pamilya human gipusil.

Ang asawa maoy nagmaneho sa motorsiklo samtang ang amahan naa sa tunga ug gisapwang kini sa iyahang anak nga angkas sab sa motorsiklo paingon unta sa Balamban District Hospital.

Apan giingong nigukod ang suspetsado ug pag-abot sa may Barangay Cantuod gitiwasan og pusil sa suspek ang amahan nga naigo sa kuto-kuto ug ang anak natapsingan sa bala ang ulo niini.

 “Wala pa gyud kalayo mga around 30 meters lang giapas gyud atong suspect ug gitiwasan gyud, naigo pud ato nga time ang atong victim 2 which is ang anak,” sigon ni Garcia.

Giadto na sa kapulisan ang gipuy-an sa suspetsado sa Barangay Singsing apan wala kini didto, gihangyo na sab nila ang mga kabanay niini nga i-surrender kini aron mahatagan og hustisya ang nahitabo sa mga biktima. (BANAT NEWS)