CEBU, Philippines — Ang kagamhanan sa Probinsiya sa Sugbo pinaagi sa Economic Enterprise Council (EEC) nihatag og original proponent status (OPS) sa Suez Group alang sa waste-to-energy (WTE) nga proyekto sa probinsiya.
Kini human gipresentar ni Suez Project Development Director Kohei Kimura ang unsolicited proposal sa kompaniya alang sa WTE nga proyekto atol sa tigom sa EEC nga gipangulohan ni Gobernador Gwendolyn Garcia niadtong Oktubre 10, 2024 diha sa Kapitolyo.
Ang kompaniya nagplano sa pag-invest og P9.12 bilyones alang sa proyekto nga nagtinguha sa pagsulbad sa nagkadako nga problema sa basura sa lalawigan.
Nasayran nga ang unang mga diskusyon alang sa proyekto nagpakita nga ang joint venture maglihok ubos sa Build-Transfer-Operate scheme. Base sa report sa Sugbo News, ang opisyal nga media arm sa Capitol nga ang Suez Group usa ka global utility company nga nakabase sa France diin nailhan sila sa pagdumala sa tubig ug basura. Lakip niini ang waste treatment, pag-recycle, resource recovery, pagdumala sa tubig ug paghimo sa mga teknolohiya aron suportahan ang circular economy. Gikataho nga ang maong kompaniya naglihok ngadto sa kapin 70 ka nasud nga ilado sa ilang liderato sa sustainable urban development.
Base sa Seksyon 4-A sa RA 7718 sa unsolicited proposals, ang kompaniya nga gihatagan og OPS adunay 30 ka adlaw aron itukma ang usa ka mas ubos nga presyo nga tanyag gikan sa nagkabangga nga bidder atol sa Swiss challenge. Ang proseso nagtinguha usab sa pagdasig sa kompetisyon pinaagi sa pagdani sa ubang investors nga mahimong magpresentar og mas pabor nga mga termino alang sa gobiyerno. Ug kong matuman kini nga proyekto tukoron ang maong pasilidad diha sa 7.6-hectare nga yuta nga gipanag-iya sa Kapitolyo sa Barangay Tinaan, Dakbayan sa Naga.
Ang maong pasilidad sa Sugbo adunay potensiyal nga mahimong una nga operational WTE nga pasilidad sa Pilipinas.
Ubos sa gisugyot nga WTE nga proyekto ang solid waste gikan sa mga lungsod ug component nga mga siyudad sa Sugbo kolektahon ug iproseso sa pasilidad nga mo-convert sa basura nga mahimong enerhiya.
Pinaagi niini nga inisyatibo, ang lalawigan nagtinguha nga mamenosan ang paggamit sa mga landfill ug ma-promote ang sustainable waste management. Samtang ang enerhiya nga ma-produce sa pasilidad ibaligya ngadto sa power grid o sa mga pribadong buyer. (BANAT NEWS)