CEBU, Philippines — Ang mga sakop sa Persons with Disabilities (PWD) sa dakbayan sa Sugbo mahimo nang makakuha sa ilang appointment online, ug ipa-deliver ang ilang mga ID tungod sa bag-o lang giaprobahan sa Cebu City Council nga ordinansa nga naglakip sa maong mga probisyon.
Mao kini ang ordinansa ni Konsehal Jose Lorenzo Abellanosa nga nag-amendar sa City Ordinance no 2614 o mas nailhan nga “An Ordinance establishing the Persons with Disability Affairs Office (PDAO) and Providing Funds for its Operations and Maintenance and for other purposes”.
Naaprobahan kini sa ikatulo ug katapusang pagbasa atol sa regular session niadtong Miyerkules.
Ang ordinansa giamendar aron madugangan ang Section 7-A ubos sa PWD Registration ug IDs. Ubos niini nga seksyon, gimando nga ang PDAO ang mamahimong responsable sa pag-isyu sa mga PWD ID.
Matud pa niini nga ang master list sa tanang residente sa PWD sa Dakbayan sa Sugbo kinahanglang i-update matag tuig nga dili molapas sa ika-3 sa Enero matag tuig.
Ang maong ordinansa usab nag-amendar ug midugang sa Section Z-B nga mao ang Online Appointment and Delivery sa mga PWD ID.
Niini, ang PDAO magtukod ug online appointment system ug himoon kini nga option alang sa mga magparehistro online isip PWD.
Matud ni Abellanosa, kini nga ordinansa nagtumong sa pagpadali sa mga proseso ug pag-atiman sa komunidad sa PWD. Dugang pa niya, angayan lamang nga ang mga sakop sa PWD maka-access niining mga serbisyo sa tukma nga panahon ug cost-effective nga paagi gikan sa ilang mga panimalay.
Mokabat sa P2 milyones ang inisyal nga kantidad nga igahin alang sa operasyon sa Online Appointment System sa PDAO. (BANAT NEWS)